ដោយមានការចង្អុលបង្ហាញពី ឯកឧត្ដមអគ្គនាយក​ នៃអគ្គនាយកដ្ឋានប្រតិបត្តការ និងសេវាកម្ម ទៅលើការពង្រឹងសមត្ថភាពមន្ត្រីបច្ចេកទេសឧតុនិយម នាយកដ្ឋានឧតុនិយមអាកាសចរណ៍ សហការជាមួយ វិទ្យាស្ថានជាតិអាកាសចរណ៍ស៊ីវិល បានបើកវគ្គបណ្ដុះបណ្ដាលទៅលើជំនាញ “ព័ត៌មានឧតុនិយមសម្រាប់សេវាកម្មនាំផ្លូវអាកាស” ដែលមានរយៈពេល០៣សប្ដាហ៍ ពីថ្ងៃទី០២ ដល់ថ្ងៃទី២៣ ខែមិថុនា ឆ្នាំ២០២៥។ សិក្ខាកាមដែលបានចូលរួមវគ្គបណ្ដុះបណ្ដាលនេះមានចំនួន ២៣រូប ដែលសុទ្ធសឹងជាមន្ត្រីនៃ នាយកដ្ឋានឧតុនិយមអាកាសចរណ៍។ នៅក្នុងវគ្គសិក្សានេះដែរ មន្ត្រីទាំងអស់ទទួលបាននូវការពន្យល់នូវការធ្វើបច្ចុប្បន្នភាពថ្មីៗទៅលើបច្ចេកទេសក្នុងការងារអង្កេតអាកាសធាតុ ក៏ដូចជាការព្យាករណ៍អាកាសធាតុ សម្រាប់បម្រើឱ្យប្រតិបត្តិការហោះហើរ។ មន្ត្រីទាំងអស់ក៏បានទទួលនូវការបណ្ដុះបណ្ដាលទៅលើប្រភេទព័ត៌មានឧតុនិយមផ្សេងៗទៀតដែលបម្រើដល់សេវាកម្មនាំផ្លូវអាកាស ដែលអនុលោមទៅតាមច្បាប់អាកាសចរណ៍ស៊ីវិលរបស់ជាតិ និងអង្គការអាកាសចរណ៍ស៊ីវិលអន្តរជាតិ។ ជាងនេះទៅទៀត សិក្ខាកាមទាំងអស់បានចុះទៅអនុវត្តផ្ទាល់នៅការិយាល័យផ្ដល់សេវាកម្មឧតុនិយមអាកាសចរណ៍ នាអាកាសយានដ្ឋានអន្តរជាតិតេជោ ដែលគ្រោងនឹងដាក់ឱ្យដំណើការនៅ ខែកញ្ញា ឆ្នាំ២០២៥ ខាងមុខ។