ការិយាល័យគ្រប់គ្រងចរាចរណ៍ផ្លូវអាកាសភាគនិរតីនៃរដ្ឋបាលអាកាសចរណ៍ស៊ីវិលប្រទេសចិន (SWATMB, CAAC) ក្រោមកិច្ចសហប្រតិបត្តិការជាមួយនាយកដ្ឋានឧតុនិយមអាកាសចរណ៍នៃរដ្ឋលេខាធិការដ្ឋានអាកាសចរណ៍ស៊ីវិល (AMD, SSCA)បានផ្តល់អាហារូបករណ៍វគ្គសិក្សា Meteorology On-Job Training នាយកដ្ឋានឧតុនិយមអាកាសចរណ៍បានចាត់បញ្ជូនមន្ត្រីបច្ចេកទេសឧតុនិយមចំនួន៣រូបចូលរួមវគ្គសិក្សាចាប់ពីថ្ងៃទី៣១ ខែកក្កដា ដល់ថ្ងៃទី២៥ ខែសីហា ឆ្នាំ២០១៧ នាទីក្រុងឈឹងទូ ប្រទេសចិន។ វគ្គសិក្សាខាងលើបានបណ្តុះបណ្តាលមន្ត្រីបច្ចេកទេសឧតុនិយមទៅលើជំនាញអង្កេត និងព្យាករណ៍អាកាសធាតុលើការផ្តល់សេវាកម្មព័ត៌មានឧតុនិយមសម្រាប់ប្រតិបត្តិការហោះហើរឲ្យមានប្រសិទ្ធភាព និងសុវត្ថិភាព។ មន្ត្រីបច្ចេកទេសឧតុនិយមនៃប្រទេសទាំងពីរបានចែករំលែកនូវបទពិសោធន៍ទៅវិញទៅមកលើការងារបច្ចេកទេសឧតុនិយម និងបានផ្តល់មតិយោបល់ក្នុងការកែប្រែនូវប្រតិបត្តិការការងារដើម្បីអភិវឌ្ឍន៍សមត្ថភាពការងារបច្ចេកទេសឧតុនិយមផងដែរ។ នាយកដ្ឋានឧតុនិយមអាកាសចរណ៍នៃរដ្ឋលេខាធិការដ្ឋានអាកាសចរណ៍ស៊ីវិល និងការិយាល័យគ្រប់គ្រងចរាចរណ៍ផ្លូវអាកាសភាគនិរតីនៃរដ្ឋបាលអាកាសចរណ៍ស៊ីវិលប្រទេសចិននឹងបន្តកិច្ចសហប្រតិបត្តិការឲ្យកាន់តែល្អបន្ថែមទៀតដើម្បីឆ្លើយតបទៅនឹងបម្រែបម្រួលអាកាសធាតុ ជាពិសេសសម្រាប់វិស័យអាកាសចរណ៍ស៊ីវិល។